Húsvískir daglaunamenn réðust í að stofna með sér félag um stéttbundin hagsmunamál sín 14. apríl 1911, Verkamannafélag Húsavíkur. Nokkrum árum síðar eða 28. apríl 1918 stofnuðu verkakonur á Húsavík með sér eigið félag, Verkakvennafélagið Von. Vorið 1964 sameinuðust félögin undir nýju nafni, Verkalýðsfélag Húsavíkur.
Verkalýðsfélag Raufarhafnar var stofnað árið 1967 en það sameinaðist Verkalýðsfélagi Húsavíkur þann 1. júlí 2004 undir nafni Verkalýðsfélags Húsavíkur. Þann 6. júní 2006 sameinuðust svo Verkalýðsfélag Húsavíkur og Verkalýðsfélag Öxarfjarðar undir nafninu Verkalýðsfélag Húsavíkur og nágrennis.
Verslunarmannafélag Húsavíkur var stofnað 6. september 1965. Fyrsti formaður félagsins var Guðmundur Bjarnason síðar ráðherra. Þann 1. maí 2008 sameinuðust Verkalýðsfélag Húsavíkur og nágrennis og Verslunarmannafélag Húsavíkur undir nafninu Framsýn- stéttarfélag. Félagið nær frá Vaðlaheiði í vestri, allt austur fyrir Raufarhöfn.
Næstum öld er liðin frá því að frumherjarnir stigu fyrstu sporin og sýndu það áræði að stofna með sér félag sem hafði það að markmiði að gæta hagsmuna verkafólks; því kjark þurfti til fyrir fátæka menn og skulduga að rísa upp og krefjast bættra kjara af vinnuveitendum sínum. Eitt af því sem okkur ber að varðveita er saga þessara manna sem mörkuðu sporin og lögðu þann grunn sem við byggjum á í dag.
Það var stór stund í Verkalýðsfélagi Húsavíkur þegar tekin var ákvörðun um á 75 ára afmæli félagsins að láta skrá sögu þess. Í júní 1991 var Þór Indriðason stjórnmálafræðingur ráðinn til að skrifa söguna þannig að hún yrði aðgengileg öllum þeim sem áhuga hefðu. Strax í upphafi var ákveðið að hún yrði ekki bara saga verkalýðsbaráttu heldur einnig saga atvinnulífs og stjórnmála á Húsavík í eina öld. Þessir þrír þættir eru það samofnir í okkar samfélagi að ekki verður skilið á milli þegar saga verkalýðsbaráttu á Húsavík er sögð.
Saga verkalýðsbaráttu á Húsavík er um margt mjög merkileg. Allt frá fyrstu tíð höfðu Verkamannafélagið og Verkakvennafélagið Von á stefnuskrám sínum að sinna kaupgjaldsmálum félagsmanna. En það var líka jafnljóst að hagsbótina mátti einnig sækja í aðra staði, hagkvæma verslun og samhjálparstarf af ýmsu tagi. Á slíkt lögðu félögin engu síðri áherslu en sjálfa kaupgjaldsbaráttuna.
Næg atvinna, öflugt mannlíf og vöxtur og viðgangur staðarins hefur alla tíð verið til umræðu á fundum félaganna. Með tímanum rótfestist sú áhersla í starfi þeirra og allar götur síðan hafa þau, og síðar Framsýn- stéttarfélag, haft mikil áhrif á alla umræðu um atvinnumál. Stéttarfélögin hafa tekið virkan þátt og jafnvel verið frumkvæðisaðili að ýmsum meiriháttar atvinnufyrirtækjum á Húsavík, fyrirtækjum sem skipt hafa sköpum fyrir viðgang Húsavíkur. Á síðari áratugum hefur viðfangsefnum íslenskrar verkalýðshreyfingar fjölgað og allt starf stéttarfélaganna orðið faglegra í eðli sínu, jafnvel sérfræðilegt í sumum tilvikum. Hreyfing verkafólks á Húsavík hefur ekki farið varhluta af þessari þróun. Sérgreinafélögum hefur fjölgað og forveri þeirra, Framsýn- stéttarfélag, hefur vaxið og eflst og starfsemi þess orðið margþættari.
Sem fyrr ber það hæst í starfi félagsins sem það tók í arf frá forverum sínum; áhersluna á vöxt og viðgang atvinnulífs, samhjálp, sem nú er rekin í mynd lífeyrissjóða og margvíslegra félagslegra réttinda og fræðslustarfs. Má jafnvel nefna að saumanámskeið eru haldin á vegum félagsins rétt eins og hannyrðanámskeiðin sem verkakvennafélagið gamla stóð fyrir á sinni tíð. Þráðurinn til upphafsins hefur ekki slitnað. Velferð verkalýðsstéttarinnar og samfélagsins alls er enn þann dag í dag það markmið sem félagið setur í öndvegi. Um 2000 félagsamenn eru í Framsýn- stéttarfélagi.
Tilkynningar
24. ágúst 2010 - kl. 13:32
Vinnustaðaskírteini
Þann 15. ágúst 2010 tók gildi samkomulag ASÍ og SA um vinnustaðaskírteini og eftirlit á vinnustöðum.
Markmið samkomulagsins er að tryggja að allir atvinnurekendur og starfsmenn þeirra fari að gildandi lögum, reglugerðum og kjarasamningum.
MEIRA
1. júní 2010 - kl. 14:05
Opnunartími í sumar
Frá 1. júní verður Skrifstofa stéttarfélaganna opin frá kl. 08:00 til 16:00 alla virka daga. Þessi opnunartími gildir til 31. ágúst 2010.
19. maí 2010 - kl. 09:28
Orlofsuppbót 2010
Full orlofsuppbót árið 2010 er kr. 25.800,-
Gildir almennt fyrir félaga í Framsýn, Þingiðn og Starfsmannafélagi Húsavíkur.
Full orlofsuppbót félaga í deild verslunar- og skrifstofufólks innan Framsýnar er kr. 19.500,-
Misjafnt er á milli kjarasamninga hvenær greiða skal orlofsuppbótina og með hvaða hætti hún er reiknuð út fyrir þá sem eru í hlutastörfum eða hafa starfað hluta úr ári. Nánari upplýsingar eru gefnar á Skrifstofu stéttarfélaganna í síma: 464-6600.
12. febrúar 2010 - kl. 12:02
Skólastjórnendur athugið
Að venju vilja stéttarfélögin bjóða grunnskólum í Þingeyjarsýslum upp á fræðslu um markmið og tilgang stéttarfélaga. Félögin hafa í gegnum tíðina átt mjög gott samstarf við grunnskólana á félagssvæðinu og komið nokkuð reglulega í heimsóknir.
Fræðslan sem við bjóðum upp á er ætluð nemendum í 10. bekk og neðar óski skólarnir eftir því.
Ef þið hafið áhuga fyrir því að fá okkur í heimsókn í vetur eða vor, vinsamlegast hafið þá samband við Skrifstofu stéttarfélaganna þegar ykkur hentar.
6. janúar 2010 - kl. 11:02
15% afsláttur í Jarðböðin
Samkvæmt samkomulagi eiga félagsmenn stéttarfélaganna í Þingeyjarsýslum rétt á 15% afslætti fari þeir í Jarðböðin í Mývatnssveit. Áður er farið er, þurfa félagsmenn að koma við á Skrifstofu stéttarfélaganna og fá sérstök afsláttarkort. Góða skemmtun.
17. september 2009 - kl. 07:53
Íbúðir á Akureyri í boði fyrir félagsmenn
Stéttarfélögin hafa samið um aðgengi að tveimur íbúðum á Akureyri fyrir félagsmenn. Íbúðirnar eru í Hrísalundi. Nánari upplýsingar og leiguverð er á þessari slóð. http://lyngholt.is/ Þar er einnig hægt að bóka sig. Þá gefur Karen Rut Konráðsdóttir frekari upplýsingar í síma 468-1239 eða 897-5064.
2. maí 2007 - kl. 08:17
Góður afsláttur fyrir félagsmenn hjá Frumherja
Stéttarfélögin í Þingeyjarsýslum eru með samning við Frumherja um að veita félagsmönnum 15% afslátt af reglubundinni skylduskoðun ökutækja á þeirra vegum. Afslátturinn fæst gegn staðfestingu á því að þeir séu félagsmenn. Áður en að félagsmenn láta skoða sína bíla þurfa þeir að koma við á Skrifstofu stéttarfélaganna og fá vottorð um að þeir séu fullgildir félagsmenn. Þessi afsláttur gildir einnig fyrir félagsmenn í Verkalýðsfélagi Þórshafnar sem geta nálgast frekari upplýsingar á skrifstofu félagsins á Þórshöfn.
7. mars 2007 - kl. 09:42
Miðar í Hvalfjarðargöng til sölu
Stéttarfélögin hafa til sölu miða í Hvalfjarðargöngin fyrir félagsmenn. Verðið per. miða er kr. 600,-. Félagsmenn í Verkalýðsfélagi Þórshafnar fá miðana á sama verði hjá skrifstofu félagsins á Þórshöfn.