• Forsíða
• Framsýn - Stéttarfélag
• Starfsmannafélag Húsavíkur
• Þingiðn
• Verkalýðsfélag Þórshafnar
• Fréttabréf
• Starfsmenn
• Orlofsmál og ferðir
• Réttindi atvinnulausra
• Lífeyrissjóðir
• Lög og reglur
• Eyðublöð
• Aðrir vefir
• Um vefinn
• Starfsmat sveitarfélaga
• English
• Polski

4. febrúar 2010 - kl. 15:37

Iðnaðarráðuneytið sker niður framlög til Þingeyinga

Iðnaðarráðuneytið hefur ákveðið að skera niður fjármagn til Vaxtasamnings Norðausturlands um 5 til 6 milljónir eða um 15 til 20% á árinu 2010. Um er að ræða samþykkt loforð til atvinnusköpunar í þingeyjarsýslum. Samkvæmt upplýsingum Framsýnar- stéttarfélags hefur iðnaðarráðuneytið ákveðið að bæta Suðurnesjunum við í vaxtarsamningana án þess að heildarpotturinn verði stækkaður. Þessi vinnubrögð eru forkastanleg, sjá meðfylgjandi bréf um málið frá Framsýn til iðnaðarráðherra.

Framsýn hefur verið í sambandi við þingmenn og ráðherra kjördæmisins og skorað á þá að koma í veg fyrir þetta. Það ætti ekki að vera erfitt fyrir þá, vilji þeir standa undir nafni, þar sem um samþykktar fjárveitingar er um að ræða út þetta ár.

Að sjálfsögðu er það hið besta mál að gerður verði vaxtasamningur fyrir Suðurnesin en að fjármunir séu teknir frá okkur til að svo geti orðið er afar undarlegt, svo ekki sé meira sagt. Þáverandi iðnaðarráðherra Össur Skarphéðinsson tók sérstaklega fram þegar samningarnir voru undirritaðir að frumkvæði og hugmyndir yrðu að koma af svæðinu, en treysta mætti því að góðar hugmyndir myndu fá brautargengi af hálfu opinberra aðila. Í ljósi þessara orða er með ólíkindum að núverandi iðnaðarráðherra ætli að skera niður samþykktar fjárveitingar og færa þær á Suðurnesin. Það er ekki nóg með að aðrar reglur virðast gilda þar varðandi umhverfismat en gilda hér fyrir norðan. Til viðbótar á að skera niður peninga til atvinnuuppbyggingar í Þingeyjarsýslum og færa þá suður á sama svæði. Er þetta nýja Ísland? Vitað er að Atvinnuþróunarfélag Þingeyinga hefur einnig gert athugsemdir við ákvörðun Iðnaðarráðuneytisins.

Iðnaðarráðuneytið
Katrín Júlíusdóttir
Arnarhváli
150 Reykjavík

Húsavík 29. janúar 2010
Varðar vanefndir á framlögum til Vaxtasamnings Norðausturlands

Vaxtasamningur Norðausturlands var undirritaður í ársbyrjun 2008 milli Atvinnuþróunarfélags Þingeyinga fh. svæðisins og iðnaðarráðuneytisins. Þáverandi iðnaðarráðherra Össur Skarphéðinsson undirritaði samninginn fh. ráðuneytisins sem var til þriggja ára, 2008-2009-2010.

Hugmynd stjórnvalda með vaxtasamningnum var að ráðstafa til mótvægisaðgerða vegna aflabrests í þorski, samtals um 90 milljónum króna inn á athafnarsvæði atvinnuþróunarfélagsins. Það er 30 milljónir á ári. Iðnaðarráðherra lagði áherslu á það í ávarpi sínu við undirritunina að frumkvæði og hugmyndir yrðu að koma af svæðinu, en treysta mætti því að góðar hugmyndir myndu fá brautargengi af hálfu opinberra aðila.

Vaxtasamningurinn hefur komið Þingeyingum að góðum notum og var þegar byrjað að ráðstafa peningum úr honum til verkefna á árinu 2008 enda ásóknin mikil. Úthlutað var aftur á árinu 2009, sjá eftirfarandi frétt á heimasíðu atvinnuþróunarfélags í október 2009:

Yfir 40 milljónir króna til nýsköpunar- og þróunarverkefna
„Stjórn Vaxtarsamnings Norðausturlands (VAXNA) hefur farið yfir og afgreitt umsóknir um þátttöku í verkefnum. Alls bárust 21 umsókn og samtals var sótt um tæpar 70 milljónir kr. Samþykkt var þátttaka í 10 verkefnum að upphæð samtals rúmlega 20 milljónir kr. Samþykkt var þátttaka í eftirtöldum verkefnum:
• Samstarf safna og sýninga í Þingeyjarsýslum
• Sail Húsavík 2011
• Þingeyska matarbúrið
• Jólasveinarnir í Dimmuborgum - töfraland jólanna
• GEBRIS - samstarfsverkefni á svæðinu austan Jökulsár á Fjöllum
• Norðausturland.is - sameiginlegt kynningarstarf á starfssvæðinu
• Upplifum landið - Geotourism
• Nýting íslenskra berja
• Myndun og uppbygging þekkingarklasa í Langanesbyggð
• Stefnumótandi ferðamálaætlun fyrir Norðausturland - framkvæmd verkefna
Samkvæmt ákvæðum vaxtarsamningsins skulu umsækjendur leggja fram a.m.k. sömu upphæð til verkefnanna sem þýðir að gera má ráð fyrir að á næstu misserum verði varið yfir 40 mkr. til þeirra nýsköpunar- og þróunarverkefna sem stjórn VAXNA hefur nú samþykkt þátttöku í.“

Eins og sjá má er mikil ásókn í fjármuni í verkefni sem ætluð eru til að efla byggð og búsetuskilyrði á svæðinu. Það eru því mikil vonbrigði að iðnaðarráðuneytið ætli að skera niður samþykkt framlög vegna ársins 2010 niður um 5 til 6 milljónir eða um 15 til 20%.

Samkvæmt upplýsingum Framsýnar- stéttarfélags hefur iðnaðarráðuneytið ákveðið að bæta Suðurnesjunum við í vaxtarsamningana án þess að heildarpotturinn verði stækkaður. Ráðuneytið beitir nýrri nálgun á skiptingu fjármunanna sem þýðir að skerða á okkar samning um 5-6 milljónir á árinu en einnig verður samningur Eyfirðinga skertur. Norðurland vestra sleppur hins vegar við skerðingu, en þessir þrír samningar gilda allir út árið en verið er að ganga frá nýjum samningum á öðrum svæðum. Það er afar furðulegt að ráðuneytið skuli ganga á gildandi samninga til að koma nýjum samningum inn. Þá liggja heimamenn undir ákveðinni hótun um að ef þeir samþykki ekki skerðinguna, komi til greina að fella samninginn úr gildi sem eru forkastanleg vinnubrögð.

Framsýn er aðili að Atvinnuþróunarfélagi Þingeyinga ásamt Byggðastofnun og sveitarfélögum á svæðinu. Á síðasta fundi stjórnar atvinnuþróunarfélagsins var eftirfarandi bókun gerð:

„Stjórn AÞ átelur það að iðnaðarráðuneytið skuli tilkynna símleiðis um einhliða skerðingu á greiðslum til gildandi vaxtarsamninga á landsbyggðinni. Svo virðist sem megin ástæða skerðingarinnar sé að skapa svigrúm til gerðar nýrra samninga, þar sem m.a. er verið að bæta við einu helsta þenslusvæði landsins á undanförnum árum. Í ljósi þess að tilkynnt er um skerðinguna undir þeim formerkjum að verði ekki á hana fallist sé allt eins líklegt að samningum verði sagt upp, sér stjórnin sér ekki annan kost færan en að hlíta flötum 5 mkr. niðurskurði á ríkisframlagi ársins. Jafnframt telur stjórnin tímabært að þegar verði hafin vinna við heildarendurskoðun á fjármögnun og skipulagi stoðkerfis atvinnu- og byggðamála sem atvinnuþróunarfélögin eru hluti af.“

Framsýn- stéttarfélag gagnrýnir harðlega vinnubrögð Iðnaðarráðuneytisins og hvetur iðnaðarráðherra til að koma í veg fyrir að Iðnaðarráðuneytið standi ekki við gerða samninga sem byggja á að ýta undir nýusköpun í Þingeyjarsýslum. Svona vinnubrögð eru gjörsamlega óþolandi.

Þess er óskað að bréfinu verði svarað sem fyrst.

Virðingarfyllst!

Fh. Framsýnar- stéttarfélags

Aðalsteinn Á. Baldursson

Afrit:
Sveitarstjórnir í Þingeyjarsýslum
Atvinnuþróunarfélag Þingeyinga

 

<< til baka

Tilkynningar