• Forsíða
• Framsýn - Stéttarfélag
• Starfsmannafélag Húsavíkur
• Þingiðn
• Verkalýðsfélag Þórshafnar
• Fréttabréf
• Starfsmenn
• Orlofsmál og ferðir
• Réttindi atvinnulausra
• Lífeyrissjóðir
• Lög og reglur
• Eyðublöð
• Aðrir vefir
• Um vefinn
• Starfsmat sveitarfélaga
• English
• Polski

3. maí 2010 - kl. 11:38

Ræða Guðna Ágústssonar frá 1. maí

„ Auðlegðin er eigi smá
Og ekki smiðurinn gleyminn,
Sem lætur sérstætt andlit á
alla sem koma í heiminn.“
Svo kvað Húsvíkingurinn Karl Kristjánsson alþingismaður.
Í dag er það maístjarnan mín og þín sem kallar okkur saman til að fagna og þakka. Ennfremur til að horfast í augu við ákveðin grundvallarmistök sem hafa hent álfu vorrar yngsta land. Við dagsbrún nýrrar aldar fyrir eitt hundrað árum færðust inní landið nokkrar stórar hreyfingar fólksins sem rufu kyrrstöðuna. Það var morgunroði hins nýja lýðræðis sem þá var við hafsbrún.

„Vér heilsum djúpt, vér erum undiralda.“ Sagði Þingeyingurinn og skáldið Einar Benediktsson. Hann sagði líka.“ Reistu í verki viljans merki,- vilji er allt sem þarf.“

Hér var vagga Samvinnuhreyfingarinnar Benedikt á Auðnum Jónas frá Hriflu voru eldhugarnir. Í dag á Jónas afmæli 125 ár frá fæðingu hans. Fréttablaðið vitnar til hans í dag fyrir eitt hundrað árum sagði hann í Skinfaxa þetta og það hljómar einsog aðvörun gagnvart glæframennsku síðustu ára.“ Við meigum ekki gleyma því að í landinu hefur myndast hópur fjárglæframanna,sem aðallega gera sér að atvinnu að stofna félög,sprengja þau og hirða molana. Þeir menn eru lausir við flestar siðlegar hömlur. Fjárgræðgin knýr þá áfram,hegningarhúsið er hið eina sem þeir forðast. Þessvegna beita þeir kænsku sinni til að svíkja lögum samkvæmt,þvílíkir ræningjar eru mestu skaðræðismenn samtíðarinnar.“ Hér var jafnan klappað fyrir Jónasi eigum við ekki að gefa gamla manninum enn eitt klappið fyrir varnir hans og afrek. Kaupfélögin voru nýr drifkraftur gegn einangrun og fátækt þau færðu þjóðina til sóknar. Hér stóð einnig vagga ungmennafélagshreyfingarinnar sem blés mönnum samstöðu og kjark í brjóst. Íslandi allt, ræktun lýðs og lands.

Hér stóð einnig vagga verkalýðshreyfingarinnar. Enn er hér gagnrýnin rödd sem efast og velgir valdinu undir uggum. Til hamingju með dag verkalýðshreyfingarinnar til hamingju með sigra,svita og tár fólksins sem hélt á haka og skóflu baráttunnar. Jesús Kristur var ekki hagfræðingur frá Háskóla Íslands hann var trésmiður frá Nasaret og hefði tilheyrt ASÍ væri hann á meðal vor. Hans hagfræði og stjórnmálafræði hefði aldrei kennt æskunni. “Að græða á daginn og grilla á kvöldin.“
„Í sveita þíns andlitis skalt þú brauðs þíns neyta voru kenningar hans.“ Lærisveinar hans voru fyrstu jafnaðar og samvinnumennirnir á jörðinni þeir skiptu með sér eignum sínum og börðust fyrir fjöldann.
Græðgin var bannorð þeirra. Einn fyrir alla og allir fyrir einn. Öll vitum við hvernig fór fyrir þeim eina í röðum postulanna sem var frjálshyggjumaður og seldi leiðtoga sinn fyrir þrjátíu silfur peninga. Á degi sem þessum þegar við þökkum starf frumherjanna, þá spyrjum við einnig hefur verkalýðshreyfingin gengið götuna til góðs fram eftir veg?
Er hún enn svipa og samviska þessarar þjóðar? Hin óspillta mey sem segir satt og veit hvert hún er að fara? Bóndasonurinn á Kirkjubóli Guðmundur Böðvarsson spurði í ljóði sínu:´
„ Eitt verð ég að segja þér áður en ég dey,
Enda skalt þú börnum þínum kenna fræði mín
Sögðu mér það álfarnir í Suðurey,
Sögðu mér það dvergarnir í Norðurey og gleymmérei
Og gleymdu því ei:
Að hefnist þeim er svíkur sína huldumey
Honum verður erfiður dauðinn“.

Hefur Verkalýðshreyfingin gleymt sinni huldumey?. Hefur íslenska þjóðin svikið sína huldumey?. Maístjarnan gaf okkur baráttumenn sem leiddu íslenska alþýðu til sigra.
Er lýðveldið sem stofnað var til á Þingvöllum 1944 í hættu? Hver frelsaði togarajaxlinn undan kúgun, man enginn lengur vökulögin.
Hefur Verkalýðshreyfingin sofnað á vakt gróðans og gleymt sér. Hefur hún setið við borð víxlaranna. Eiga hennar menn kennitölur á Tortúla? Þannig er spurt í dag.

Setja ASÍ menn upp annan hatt á kvöldin og önnur gleraugu?. Er fólkið í verkalýðshreyfingunni að vakna upp við vondan draum um að hönd græðginnar sópaði útúr sjóðum fólksins hundruðum eða þúsundum milljaðra. Hvað með lífeyrissjóðina hvað með bótasjóðina? Er verðtryggingin mikilvægari fyrir þá auðugu þó hún setji æskumanninn í eilífan þrældóm. Eignast bankarnir og ríkið allt hér einsog í Sovétríkjunum forðum. Missir fólkið allt sitt,fari svo þá deyr vonin.

Hefur lýðræðið beðið skipbrot eða tekur ekki lengur að spyrja fjöldann.
Félagsmenn ASÍ eru eitt hundrað og tólf þúsund manns. Hversvegna nægir að tvö til þrjú hundruð félagsmenn eða svo ákveði að Alþýðusambandið styðji inngöngu Íslands í Evrópusambandið? Er slorlyktin í sjávarþorpunum og fjósalyktin í sveitunum svo þrúgandi að menn vilja bretann á ný á miðin? Skynja menn ekki heldur hættuna þegar fimmtán þúsund landsmenn eru án atvinnu? Að bóndinn að sveitin skapar þúsundum félagsmanna ASÍ vinnu. Hvað verður um þessi störf og þessa þjóð ef landbúnaðurinn hopar og hverfur úr byggðunum?
Ég þakka ykkur Aðalsteinn Baldursson og Framsýnarmönnum stuðning við íslenskan landbúnað og bændur sveitanna.
Hvað með matavælaöryggi og gjaldeyrissparnað?
Við eigum einstakan landbúnað og gott land þótt það sé land elds og ísa. Við eigum nóttlausa og bjarta sumarnótt einstakt gras sem vex undan sól og regni. Við eigum hreina búfjárstofna og einstaka náttúru. Þegar ég varð landbúnaðarráðherra stóð til að rækta krókódíla hér á Húsavík, kjöt og leður sögðu fræðingarnir.
Ég hafnaði fyrirhuguðu krókudílaeldi ykkar Húsvíkinga ekki af skepnuskap einum saman. Ég komst að raun um að krókódílar eru stórhættuleg kvikindi geta hlaupið á sextíu kílómetra hraða og étið Húsvíkinga.
Hákon Aðalsteinsson kvað svo í ykkar orðastað eftir að ákvörðun mín lá fyrir.
„ Húsvíkingar sitja nú í sárum
Sviftir eru góðri tekjuvon.
Grætur köldum krókudílatárum
Kvikindið hann Guðni Ágústsson“.

Ég hafnaði líka hættulegu erlendu kjöti og lifandi kvikfénaði .
Ég fékk líka að kynnast því hvað pestirnar erlendis eru hættulegar. Þið munið enn þegar ég kom frá Kína hálfdauður úr kamfílóbakter eftir einhverja veisluna hjá þeim skásettu þarna niðri. Þá báðu vinir mínir Álftgerðisbræður hann Jóhannes Sigfússon á Gunnarstöðum að yrkja vísu fyrir samkomuna um kvöldið þegar veikindi mín spurðust út í sjónvarpi.
Já þegar ráðherra verður veikur ég tala nú ekki um er hálfdauður þá skemmta menn sér. Jóhannes orti:
„Nú kominn er Guðni með glans
Og gengt hefur störfum að fullu.
Heimurinn víkur úr vegi þess manns
Sem veikist af kínverskri alþýðumannaveiki“.

Jóhannesi hefur orðið um og ó hvað menn skemmtu sér á minn kostnað því hann gerði bragarbót að vísu öfugmælavísu og orti nú.
„Guðni er glæsimenni að sjá
góðum kostum ræður.
Minnir nánast ekkert á
Álftagerðisbræður “.

Ísland er matvælaland við færum veröldinni matvæli úr auðlindum okkar. Af gæðunum erum við þekkt. Sjórinn er gjöfull en landið er ekkert síðra. Íslenskir bændur skapa eitt hundrað milljónir á hverjum degi í verðmætum. Einn milljarður manna gengur svangur til rekkju sinnar á kvöldin. Við búum að mörgu leyti í ónumdu landi, getum við Íslendingar lagt umheiminum til meiri mat? Við tölum í álverum en ekki um t.d. stóriðju í ylrækt sem Sveinbjörn Björnsson háskólarektor Suður Þingeyingur talaði um fyrir fjörutíu árum. Engin matvæli keppa í gæðum við íslensk hér eru engin aðskotaefni hér þarf ekki að úða með eitri.

Hvernig væri græn stóriðja á Húsavík og Þeystareykjasvæðinu? Að tómatar og grænmeti væri ræktað hér í ylræktarveri og flogið með varninginn út frá Aðaldalsflugvelli. Að stofna Kálver og Álver á Húsvík.

Bleikja er landbúnaður hún fer sigurför um heiminn sem íslensk afurð, eldislaxinn þekkjum við hér. Ég hef heyrt um matfisk sem ræktaður er við 27 gráðu hita og heitir Tilapía, passar hann hér? Það er fleira matur en ál eins og karlinn sagði, þótt það geti einnig verið hér eins og þið áformið. Hvað með fiskinn barra?

Ég skora á verkalýðsfélagið að horfa til nýrra tækifæra í matvælaframleiðslu og landbúnaði hér á svæðinu. Þessi hugsun mín er ekki bara draumsýn Kári Stefánsson segir mér að í Bandaríkjunum séu allir tómatar ræktaðir í gróðurhúsum einsog hér. Þrjú hundruð milljón manna markaður þar og svo Evrópa. Tækifæri í landbúnaði hér eru stórlega vanmetin. Bragðbesti tómaturinn er okkar.

Liggur endurreisn kaupfélagsins í svona framtíðarsýn. Frjálshyggjan fór í sveig framhjá Skagfirðingum. Þar rennur arðurinn af öllu saman til fólksins í Skagafirði. Hvað ef veldi KEA væri enn uppi. Ef Kaupfélag Þingeyinga tæki til óspilltra málanna á ný. Á hinn öflugi Sparisjóður ykkar að leggja svona hugsun lið. Bankarnir eru fullir af peningum þeir meiga ekki liggja eins og ormar á gulli.
Nú þarf að framleiða meira í landinu og byggja upp.
Seðlabankinn dregur að sér auðinn til að fóðra okrara Jöklabréfanna. Evran er hengingaról Grikklands í dag, hjálpar hún okkur. Nei þetta er vítavert blekkingartal,hvort sem krónan lifir eða deyr. Evran er ekki myntin.

Á þessum degi spyrjum við líka hvað gerðist í íslensku þjóðfélagi hvað fór úrskeiðis. Hversvegna hrundi eitt mesta velmegunarríki í Evrópu? Þar bera margir ábyrgð sem sofnuðu á verðinum. Enginn sá þetta fyrir, frekar en náttúruhamfarir. Heimskreppa peninganna á sinn þátt. Gordon Brown á sinn þátt með hryðjuverkalögum og yfirlýsingu um gjaldþrota ísland. Ég var einn fárra sem lagði til að hann yrði kærður fyrir glæp sinn gagnvart íslenskri þjóð,það var gerræði og mannréttindabrot. Hryðjuverkalögum var beitt á bræðra þjóð friðsama og vopnlausa,svei.
Ríkisstjórnir eiga sinn þátt í hruninu ekki síst með aðgerðarleysi sínu. Við sem höfum starfað við stjórnmál þessi ár verðum að viðurkenna, að okkar ábyrgð er mikil.
Girðingar og eftirlitskerfi vantaði á siðlausa þróun, eins og hún blasir nú við. Þetta var glæfraskapur af verstu gerð í skjóli fjölmiðlavalds og græðgi einkagróðans. Alþingi, ríkisstjórnir, stjórnmálaflokkar, atvinnulífið, verkalýðshreyfingin, háskólarnir og margir einstaklingar geta ekki sagt, ekki ég.

Fjölmiðlarnir voru stungnir svefnþorni eigenda sinna og skoðana fréttamannanna eða flokkanna. Fólkið trúði margt á spilverkið og ævintýramennina. Við getum sagt eins og skáldið.
„Heimsins brestur hjálpar lið
hugur skerst af ergi.
Þegar mest ég þurfti við
Þá voru flestir hvergi“.

Hin gagnrýna rödd varð undir lýðræðið dó að hluta til í þjóðfélaginu. Okkur var ekki sagt satt. Nú liggur sannleikurinn fyrir í rannsóknarskýrslunni. Allir þeir sem töluðu gegn græðginni voru reyndar hæddir með því að þeir væru torfkofamenn aftan úr fornöld.
Var Sparisjóður Þingeyinga eini bankinn sem starfaði af ábyrgð. Var Ari Teitsson útvörður heiðarleikans í peningamálum.
Var það af því að siðferðið sem hann nam í móðurkjöltu og við föðurkné voru lífsmottó hans, og kunni hann boðorðin tíu? ekki síst þessi „Þú skalt ekki ljúga, þú skalt ekki stela. Þú skalt ekki ágirnast eigur annarra“.

Já það var græðgi það var siðleysi og ofurtrú á einstaklinginn.
Nýju bankarnir leyfðu valdastéttinni eigendum sínum að lána frá sér til sín og að taka ofurlaun í milljarða vís. Gráðugu bankamennirnir hirtu sjö þúsund og eitt hundrað milljarða útúr bankakerfinu 7100 milljarða. Þrjátíuföld fjárlög íslenska ríkisins. Eftir hrunið töldu menn að skuldir heimilanna bæri að lækka almennt um 20% það væru til í verkefnið í millifærslu gamla og nýja bankakerfisins 700 milljarðar.
Þessu höfnuðu stjórnvöld og ASÍ stillti sér upp með stjórnvöldum en ekki fólkinu og heimilunum.

Hverjir bergðu svo af hinum beiska bikar spillingarinnar? Aldrei fór ég suður heitir hátíð á Ísafirði. Aldrei var mér boðið í einkaþotu aldrei voru mér boðnar 300 milljónir aldrei var mér boðið kúlulán. Þeir fundu kannski af mér fjósalyktina. Já að vera úr sveit er enn vörumerki heiðarleikans.
Ég segi einsog strákurinn í Dalalíf þegar hann fann fjósalyktina af stráknum „I love it“. Hvað hefðu gömlu baráttujaxlarnir gert eða var roðinn í austri orðinn gulur eða blár. Þegar fór að dofna yfir forðum þá orti Stefán Jónsson fréttamaður Þingeyingurinn snjalli .
„ Idea er það orðið dautt
aldrei að hífa bara slaka.
Bráðum er ekkert orðið rautt
annað en nefið á Gvendi jaka.“

Í falli þínu er frelsi þitt falið, þessi tími er genginn yfir. Nú köllum við fram ný og gömul gildi aðra hugsun og byggjum land okkar upp á fáum árum bæði betra og sterkara reynslunni ríkara.
Verkalýðshreyfingin verður að vera frjáls. Hún er rödd og samviska heiðarleikans. Háskólinn verður að hreinsa falsspámennina út og rugluðu kenningarnar. Háskólarnir eru rannsóknarstofnanir sannleikans en ekki punt píkur auðvaldsins og stjórnmálaflokkanna.
Fjölmiðlarnir verða að ná frelsi sínu á ný. Fjölmiðlamaðurinn er fulltrúi sannleikans ekki flokksins eða fjárglæframannsins. Hitt er svo ljóst að við verðum að komast frá áfallinu og sjá að nýr dagur kallar okkur til starfa. Hljóti þeir dóm sem brot frömdu við tökum afsökunarbeiðnum þeirra einsog kristnum mönnum ber.

Fyrirgefningin kemur bæti menn fyrir brot sín og iðrist. Við eigum þrátt fyrir allt að geta komist yfir erfiðleikana á stuttum tíma. Við eigum lífbeltin tvö sem Kristján Eldjárn orðaði svo beltið bláa, gjöfult haf fullt af fiski . Við eigum græna beltið til landsins við eigum bændur og sjómenn. Það á að veiða meira úr sjónum. Við eigum þjóð sem kann að vinna og getur ekki sætt sig við atvinnuleysi.
Við eigum ferskvatnsauðlindir sem er olía framtíðarinnar. Við eigum fallvötn og jarðhita. Við eigum rafmagn og ennfremur í framtíðinni rafmagn í árkjöftunum þar sem ferst vatn og saltur sjór kyssast.

Við eigum olíu hér á Drekasvæðinu það segir vinur minn Össur Skarphéðinsson og ekki lýgur hann. Við sækjum háhita til rafmagnsframleiðslu á 5 til 10 kílómetra dýpi. Það ku vara farið að kólna hjá kölska sjálfum. Ísland er miðdepill á norðurslóðunum og þær eru að opnast með nýrri viðskiptalegu nýrri siglingaleið fyrir landið okkar.

Við erum framleiðsluþjóð. Við eigum mannvit og þekkingu sem aflar peninga. Við eigum menntaða þjóð.

Ágætu Þingeyingar!
Þið eigið merka sögu og gamla og nýja áttavita til að styðjast við. Grátur í nútíð er framtíðarböl og framtíðarböl er eilífðarkvöl. Við skulum ganga í bergið við eigum efni til smíðanna. Smíðum framtíðarlandið uppá nýtt í þágu okkar allra.
Á Íslandi á öllum að geta liðið vel það á að vera takmarkið. Hér viljum við búa. Við eigum að horfa og starfa með bestu þjóðum heimsins. Ísland á að vera opið og heiðarlegt athafna og framleiðslu land. Hvað sagði ekki Halldór Laxnes í ljóð sínu.

„Ég ætla að hitta kónginn í Kína
Og kannski páfann í Róm.
Hvort sem það verður til falls eða frægðar
fer ég það á íslenskum skóm“.

Já við förum það á íslenskum skóm, við eigum svo margt í gullkistum þessa lands.
Gleðilega hátíð.

 

<< til baka

Tilkynningar