• Forsíða
• Framsýn - Stéttarfélag
• Starfsmannafélag Húsavíkur
• Þingiðn
• Verkalýðsfélag Þórshafnar
• Fréttabréf
• Starfsmenn
• Orlofsmál og ferðir
• Réttindi atvinnulausra
• Lífeyrissjóðir
• Lög og reglur
• Eyðublöð
• Aðrir vefir
• Um vefinn
• Starfsmat sveitarfélaga
• English
• Polski

Lífeyrissjóðir

Tryggingadeild - sama skylda fyrir alla á vinnumarkaði
Félagsmenn í stéttarfélögunum í Þingeyjarsýslu greiða 4% iðgjald af launum sínum til tryggingardeildar lífeyrissjóðanna og launagreiðandi greiðir 8% mótframlag. Hjá starfsmönnum sveitarfélaga og ríkis er mótframlagið hærra. Þetta skylduiðgjald er hið sama fyrir alla launþega 16 - 70 ára á Íslandi. Iðgjaldið myndar víðtæk réttindi.

Ellilífeyrir
Réttur til ellilífeyris myndast almennt við 67 ára aldur, þó er hægt að seinka töku ellilífeyris til 70 ára eða flýta töku hans til 65 ára.
Almennt ávinna sjóðsfélagar sér ellilífeyri sem er 1,4% af launum, sem þýðir að eftir 45 ára starf er réttur til ellilífeyris 63% af meðallaunum á starfsævinni. Til að halda utan um réttindi eru innborganir umreiknaðar í stig þannig að u.m.b. kr. 64.000 mánaðarlaun gefa 1 stig á ári. Hærri og lægri laun veita hlutfallslega fleiri og færri stig. Við starfslok eru stigin reiknuð saman og margfölduð með 1,4 og fæst þá % sem margfölduð er með kr. 60.000 og verður niðurstaðan þá ellilífeyrir á mánuði m.v. taka hans hefjist við 67 ára aldur.
Dæmi:
Sjóðsfélagi hefur að meðaltali 192.000 á mánuði sem gefur honum 3 stig á ári. Eftir 45 ára starf á hann 135 stig * 1,4 = 189% af kr. 64.000 = kr. 120.960 á mánuði í ellilífeyri sem greiðist til æviloka.

Örorkulífeyrir
Þegar sjóðsfélagi verður fyrir langvarandi heilsutjóni (6 mán. eða lengur) vegna veikinda og/eða slysa og verður fyrir tekjutjóni vegna þess á hann rétt örorkulífeyri. Örorkulífeyri byggir á áunnum réttindum, réttindum til framreiknings sem háður er vissum skilyrðum og hlutfalli örorku sem verður að nema 50% eða meira.
Upphæð örorkulífeyris reiknuð út með sama hætti og ellilífeyrir, að viðbættum áunnum stigum koma stig sem eru framreikningur til 67 ára aldurs.
Varasamt er að taka sérstakt dæmi um útreikning á örorkulífeyri þar sem hann er nokkuð flókinn og einstakir útreikningar eiga einungis við nákvæmlega þá einstaklinga en ekki aðra.

Makalífeyrir
Við andlát sjóðsfélaga öðlast maki hans rétt til makalífeyris. Fullur makalífeyrir greiðist í 3 ár og hálfur í 2 ár. Makalífeyrir greiðist alltaf þar til yngsta barn er orðið 19 ára. Maki sem orðinn er 50 ára við andlát sjóðsfélaga fær hálfan makalífeyri til andláts. Ef maki er a.m.k. 50% öryrki er makalífeyrir greiddur til 67 ára aldurs.
Upphæð makalífeyris er reiknuð út með sama hætti og ellilífeyrir, að viðbættum áunnum stigum koma stig sem eru framreikningur til 67 ára aldurs. Margföldunarstuðull fyrir makalífeyrir er 0,7 og því er upphæð hans um helmingur af ellilífeyri.

Barnalífeyrir
Barnalífeyrir greiðist til þeirra sem fá greiddan örorku- eða makalífeyri að uppfylltum ákveðnum skilyrðum. Barnalífeyrir til makalífeyrisþega eru u.þ.b. kr. 14.000 og örorkulífeyrisþega u.þ.b. kr. 8.500 á mánuði með hverju barni yngra en 18 ára.

Frjáls viðbótarsparnaður - ákvörðun hvers félagsmanns
Félagsmenn geta ákveðið að auka lífeyrissréttindi sín með frjálsum lífeyrissparnaði (séreignarsparnaði). Gerður samningur við vörsluaðila lífeyrissparnaðar (lífeyrissjóði, banka eða fjármálafyrirtæki) og greiðir þá starfsmaðurinn 2 - 4% af launum sínum og launagreiðandi greiðir í samræmi við kjarasamninga 2% mótframlag.
Framlag starfsmanns dregst frá stofni til staðgreiðslu en lífeyrissparnaðurinn skattast þegar hann er greiddur út. Viðbótarsparnaður er séreign hvers starfsmanns og erfist því í samræmi við lög þar um.
Félagsmaður sem á viðbótarlífeyrissparnað ákveður sjálfur hvernig endurgreiðslu/útborgun á honum er háttað, þó eru nokkrar reglur sem varða lágmarkstíma og lágmarksaldur skv. eftirfarandi:
Félagsmaður verður að vera 60 ára þegar greiðsla hefst og verður þá að vara í 7 ár, því getur greiðslu úr séreignasparnaði fyrst lokið við 67 ára aldur.
Félagsmaður sem verður fyrir varanlegu heilsutjóni (örorku) getur þá fengið greiðslu úr sínum séreignarsjóði og getur greiðslu til hans lokið á 7 árum, eða á þeim tíma sem vantar í 67 ára aldur.
Við andlát félagsmanns erfist séreignarsparnaður hans til erfingja hans og skiptist milli þeirra eftir reglum erfðalaga.
Eftirlifandi maki fær sinn hluta greiddan á sjö árum eða á þeim tíma, sem makann vantar á 67 ára aldur við andlát sjóðfélagans.
Hlut barns undir 18 ára aldri skal greiða með jöfnum greiðslum á fimm árum eða á þeim árum sem upp á vantar að barnið nái 18 ára aldri.
Rétt er að hvetja félagsmenn til að taka þátt í viðbótarlífeyrissparnaði, enda veitir það þeim viðbótar lífeyrissréttindi og hærri laun.
Við ákvörðun um, við hvaða aðila er gerður samningur um viðbótarsparnað, er rétt að bera saman ávöxtun sjóðanna að teknu tilliti til áhættu við þær fjárfestingar sem viðkomandi sjóður stendur í, rekstrarkostnað þeirra (m.a. kostnaður og úttektargjald), þjónustu þeirra og ábyrgð/þjónustu vörsluaðila ef laungreiðandi stendur ekki skil á iðgjaldi og mótframlagi í samræmi við samning eða verður gjaldþrota.

Tilkynningar